BURUDANI IMERUDI TENA BARANI ULAYA HUKU LEO MAMIA YA WAPENZI WA SOKA WAKISUBIRIA MPAMBANO WA MAN-CITY NA BARCELONA

IMERUDI tena. Uhondo umerejea. Lakini, safari hii ukizubaa umewekwa kando. Hii ni kwenye mtoano wa Ligi ya Mabingwa Ulaya ambapo vigogo Manchester City watashuka dimbani kumenyana na Barcelona leo Jumanne kabla ya Arsenal kuwa mwenyeji wa mabingwa watetezi, Bayern Munich uwanjani Emirates kesho Jumatano.

Katika mechi nyingine za mtoano, Bayer Leverkusen itakuwa nyumbani kuwakaribisha matajiri wa Ufaransa, Paris Saint-Germain, wakati AC Milan itajitupa San Siro kucheza na Wahispaniola, Atletico Madrid.

Barcelona itakwenda Etihad ikiwa kwenye kiwango bora kabisa, lakini wenyeji wao wakiwa na staa wao, Yaya Toure, aliyewahi kucheza kwenye kikosi cha Wacatalunya hao kabla ya kutua England, aliyeapa kufanya kweli uwanjani huku akiwa na lengo la kuivusha Manchester City kwenye hatua hiyo ya mtoano kwa mara ya kwanza.

Kocha wa Manchester City, Manuel Pellegrini, anaamini mastaa wake wawili, Fernandinho na Sergio Aguero, watakuwa fiti kuwakabili Barcelona, ambapo kocha wake, Gerardo Martino, ana uhakika wa kupata huduma safi kutoka kwa nyota Lionel Messi na Neymar.

Mchezo huo unatazamwa kama vita ya Kilatino, kutokana na makocha hao na wachezaji waliotajwa wote kutoka Amerika Kusini. Barcelona ina uhakika zaidi wa nyota wake kutokana na wengi wao kuwa fiti, tofauti na Manchester City inayoandamwa na majeruhi.

Kwenye Uwanja wa Emirates, patakuwa hapatoshi; Arsenal itashuka hapo ikitaka kulipa kisasi dhidi ya Bayern Munich, ambayo msimu uliopita iliibuka na ushindi uwanjani hapo kabla ya wao kwenda kupoteza Allianz Arena.

Kocha Arsene Wenger ataingiza uwanjani timu yake akiwa na uhakika baada ya juzi Jumapili kuichapa Liverpool mabao 2-1 kwenye Kombe la FA na atataka pia kuwamaliza Wajerumani hao.

Lakini, Bayern Munich ikiwa chini ya kocha, Pep Guardiola, inaonekana kuwa kwenye ubora mkubwa zaidi kutokana na mwenendo wake kwenye Ligi Kuu Ujerumani ikiongoza kwa tofauti ya pointi 16. Katika kuonyesha kwamba wanajiamini kupita kiasi, mabingwa hao wa Ulaya watafanya mazoezi yao ya mwisho Ujerumani na kisha watapanda ndege moja kwa moja kwenda kuivaa Arsenal.

Mechi nyingine za hatua hiyo ya mtoano ya Ligi ya Mabingwa Ulaya zitaendelea wiki ijayo, wakati Olimpiakos itakapokipiga na Manchester United, FC Schalke 04 dhidi ya Real Madrid, Zenit St Petersburg na Borussia Dortmund na Galatasaray watakuwa wenyeji wa Chelsea.

Katika mchezo huo utakaofanyika Uturuki, Chelsea itakumbana na straika wake wa zamani, Didier Drogba, ambaye amekuwa moto zaidi kwenye kikosi hicho cha miaka ya Uturuki.

TOA MAONI YAKO HAPA CHINI