HABARI ZA CHINI CHINI ZADAI KUWA SABABU KUU YA ROONEY KUSALIA OLD TRAFFORD MKEWE KACHANGIA

WAKATI Manchester United ikionekana kukaribia kushinda mbio za kumbakiza mshambuliaji wao tegemeo, Wayne Rooney imedaiwa kuwa mkewe, Coleen Rooney ni sababu kubwa ya nyota huyo kuamua kubaki klabuni hapo.

Coleen amechangia kwa kiasi kikubwa mazungumzo ya Rooney na Man United ambayo mwishowe yatamwona staa huyo akisaini mkataba mpya wa miaka mitano huku akitarajiwa kulipwa kitita cha Pauni 300,000 kwa wiki.

Coleen anataka Rooney abaki Uingereza ili waweze kuwalea vizuri watoto wao, Kai mwenye umri wa miaka minne na Klay mwenye miezi minane.

Dili hilo lina thamani ya Pauni65 milioni na litamfanya Rooney, 28, awe mwanasoka anayelipwa zaidi katika Ligi Kuu England. Kwa sasa Rooney analipwa sawa na mshambuliaji mwenzake mahiri wa Old Trafford, Robin Van Persie huku wote wawili wakichukua kiasi cha Pauni 250,000 kwa wiki.

Rafiki wa Coleen ametoboa kuwa shoga yake huyo ndiye chanzo cha Rooney kuachana na ndoto za kucheza Real Madrid ambayo inapewa nafasi kubwa ya kumchukua kwa sababu Man United isingependa kumwona akicheza timu nyingine ya Uingereza.

“Sababu kubwa ni kwamba Coleen hataki kuhama kutoka Kaskazini Mashariki. Hilo pia ni muhimu kwa Wayne. Hana mpango wa kuhama eneo hilo lakini pia pesa nyingi wanayotaka kutoa Man United ni sababu pia,” alisema rafiki huyo wa Coleen.

“Coleen anaona ni muhimu kwa Kai na Klay kuwa karibu na wanafamilia wengine. Hataki walelewe katika nchi nyingine au eneo jingine la nchi hii. Lakini pia Coleen anafanya vizuri katika kazi yake ya uanamitindo.”

Wapenzi hao wanaishi katika eneo la Prestbury, Cheshire, na wazazi wa Coleen, Colette na Tony wanaishi maili 50 tu kutoka hapo katika eneo la Formby, Merseyside, ambako ni karibu na familia ya Rooney.

Hivi karibuni Coleen akizungumza na Gazeti la Sunday Mirror alieleza namna ambavyo Rooney atapata wakati mgumu wa kuishi bila ya msaada wa familia zao.

“Kutokana na asili ya kazi ya Rooney huwa haambiwi kama kuna mapumziko mpaka baada ya mechi. Kwa hiyo inabidi tuzoee hali hiyo kwa sasa. Na ndiyo maana wazazi wangu na wa Rooney wanasaidia sana katika hali kama hii. Tusingeweza kufanikiwa bila ya msaada wa familia zetu.”

Rooney na Coleen ambaye jina lake halisi ni Coleen McLoughlin wamekulia pamoja katika kitongoji cha Jiji la Liverpool cha Croxteth na walianza penzi lao katika mwaka wa mwisho wakiwa shule wakati huo wakiwa na umri wa miaka 16 tu. Coleen alianza kujulikana zaidi wakati Rooney alipoanza kuonyesha makali yake katika soka, Mei 2003 aliweka rekodi ya kuwa mchezaji kinda zaidi kukipiga England. Alikuwa na umri wa miaka 17.

Oktoba Mosi, 2003, Rooney alionyesha nia ya kumuoa Coleen baada ya kumvalisha pete ya uchumba yenye madini ya almasi ambayo ilikuwa na thamani ya Pauni 46,500.

Hata hivyo, Rooney alitia doa uchumba wao baada ya Agosti 2004 kukiri kwamba aliwahi kutembelea danguro la makahaba mnamo mwaka 2002 kitu ambacho kilimwacha Coleen katika mshtuko na mfadhaiko mkubwa.

“Sasa hivi inaonekana ni ujinga. Mara kadhaa nilitembelea sehemu za makahaba. Ilikuwa ni wakati nipo mtoto na sijapevuka,” alisema Rooney.

TOA MAONI YAKO HAPA CHINI