TAARIFA KUTOKA LIGI KUU YA MPIRA YA TANZANIA ZASEMA KUWA HUYU NDO MCHEZAJI WA BURUNDI AMBAE ANASUMBUWA KWENYE LIGI HIYO

SIMBA juzi Jumatano ilitoka sare ya bao 1-1 na Mtibwa Sugar katika mechi ya Ligi Kuu Bara lakini mshambuliaji wake, Amissi Tambwe ameweka rekodi ya kipekee baada ya kuifungia Simba bao la kusawazisha na hivyo kufikisha mabao 14.

Kwa kufunga bao hilo Tambwe anakuwa ameweka rekodi kwani katika misimu ya hivi karibuni hakuna mchezaji ambaye ameweza kufunga mabao 14 baada ya kucheza mechi tatu za mzunguko wa pili wa ligi na kama akiendelea na kasi hiyo huenda akafanikiwa kuwa mfungaji bora kwa mabao mengi.

Tambwe alifunga bao hilo la kusawazisha katika mechi hiyo iliyochezwa kwenye Uwanja wa Jamhuri, Morogoro dakika 50 kwa shuti kali la chini chini akipokea pasi ya Haruna Chanongo.

Kwa matokeo hayo Simba imefikisha pointi 31 na kupanda hadi nafasi ya tatu na kuishusha Mbeya City hadi nafasi ya nne. Timu zote hizo zina pointi 31 lakini Simba inanufaika na mabao ya kufunga. Ina mabao 31 wakati Mbeya City ina mabao 21

Mussa Hassan Mgosi ndiye aliyeanza kuifungia Mtibwa Sugar bao dakika ya nane baada ya kupiga krosi kali kutoka wingi ya kulia ambayo ilidakwa na kipa Ivo Mapunda lakini shuti hilo lilimparaza kipa huyo kabla ya mpira kujaa wavuni.

Katika mchezo huo ambao Mtibwa Sugar walitawala sana katika eneo la kiungo, kipindi cha kwanza ilishuhudiwa Amri Kiemba akikosa bao la wazi akiwa yeye na kipa dakika ya 19 baada ya shuti lake kupaa juu ya lango.

Dakika ya 21 Mgosi aliyewahi kuwika na Simba, alijaribu tena kumchungulia kipa Ivo Mapunda lakini shuti lake lilipaa nje kidogo ya lango.

Dakika ya 36 kocha wa Simba Zdravko Logalusic alifanya mabadiliko baada ya kumtoa Awadh Juma na kumuingiza Ali Badru mabadiliko ambayo hayakuzaa matunda kwani hadi timu zinakwenda mapumziko, Mtibwa ilikuwa ikiongoza kwa bao 1-0 huku Mgosi akiwa mwiba mchungu kwa beki wa kati wa Simba, Donald Mosoti ambaye alikuwa na kazi kubwa kumkaba mshambuliaji huyo.

Simba ilianza kipindi cha pili kwa kasi na kuweza kusawazisha bao dakika ya 50 kwa shuti la chini la Amissi Tambwe lililomshinda kipa wa Mtibwa, Hussein Sharrif ‘Casillas’.

Simba ilifanya mabadiliko tena dakika ya 51 kwa kumtoa Chanongo na kumuingiza Uhuru Seleman na Mtibwa nao wakamtoa Juma Luizio na kumuingiza, Vicent Barnabas.

Dakika ya 69, nahodha wa Mtibwa Sugar, Shaban Nditi alitolewa nje kwa kadi nyekundu baada ya kutoa lugha chafu kwa mwamuzi mwanamke, Jonesia Rukyaa wa Arusha.

Kadi hiyo ilikuja baada ya beki Salvatory Ntebe kumchezea rafu Tambwe na ndipo Nditi alipoanza kumlalamikia mwamuzi kwa lugha chafu na kuambulia kadi nyekundu.

Akizungumzia mechi hiyo, Kocha Msaidizi wa Simba, Seleman Matola alisema wanakubali matokeo ingawa alidai uwanja ulichangia matokeo hayo kwani wachezaji walishindwa kucheza kwa uhuru.

“Mechi ilikuwa nzuri tunakubali matokeo ingawa lengo letu ni kupata pointi tatu lakini hata hii pointi moja tuliyoipata si mbaya kwani imetusogeza juu na kupunguza gepu la pointi na walio juu yetu lakini pia uwanja ulikuwa kikwazo si mzuri”alisema Matola.

Naye kocha wa Mtibwa Sugar, Mecky Mexime alisema timu yake imejitahidi na wanajipanga kwa mechi ijayo ili waweze kupata matokeo mazuri ingawa akamlalamikia mwamuzi kuwa hakuchezesha kwa haki.

Baada ya mechi ya jana, Simba itacheza na Mgambo Jumapili ijayo kwenye Uwanja wa Mkwakwani, Tanga na kufuatiwa na mechi nyingine Februari 15 dhidi ya Mbeya City kwenye Uwanja wa Sokoine, Mbeya.

Vikosi

TOA MAONI YAKO HAPA CHINI