JARIBU KUPIGA MACHO HAPA KUSOMA KILE ALICHO KISEMA COACH WA CHELSEA MOURINHO KWA TIMU YA LIVERPOOL

SIO sisi tu wala Arsenal au Manchester City, lakini hata Liverpool wana nafasi kubwa ya kuchukua ubingwa wa Ligi Kuu England msimu huu. Hiyo ni kauli ya kocha wa Chelsea, Jose Mourinho, akipima joto la ligi hiyo maarufu duniani.

Ushindi wa mabao 3-2 wa Liverpool dhidi ya Fulham wa Jumatano usiku, unaiacha klabu hiyo ya Merseyside kuwa pointi nne tu nyuma ya vinara Chelsea huku zikiwa zimesalia mechi 12 kabla ya ligi hiyo kumalizika.

Wakati Chelsea, Arsenal na Manchester City zikiwa zinakabiliwa na mechi za Ligi ya Mabingwa Ulaya pia, Liverpool imebakiwa na michuano ya Kombe la FA tu na ukweli huo unamfanya Mourinho aamini kuwa hii ni faida kubwa kwa Liverpool.

“Wakati ninaposema sisi sio watarajiwa wakubwa wa ubingwa, kila mtu hapa anaanza kusema kuwa nimeanza tabia yangu ya kuchezeana akili. Lakini hizo ni hisia zangu tu. Ligi hii inashangaza sana. Ni ngumu kwa kila mmoja wetu,” alisema Mourinho.

“Kuna ambazo zina nafasi kubwa kuliko nyingine. Kwa mfano, kuna Liverpool ambayo ina nafasi kubwa kwa sababu haichezi katika Ligi ya Mabingwa. Kucheza katika Ligi ya Mabingwa kunatumia nguvu nyingi na umakini kwa timu zilizopo.

“Nadhani itachekesha sana. Tulipoteza pointi mbili na kupata moja dhidi ya West Brom na nadhani itakuwa kama hivi mpaka mwishoni mwa msimu. Kila timu inahitaji pointi kwa sababu mbalimbali. Wengine ili wasishuke daraja, wengine kwa ajili ya kucheza Ligi ya Mabingwa, kwa hiyo pointi zitakuwa ngumu.”

Katika mechi mbili zilizopita, Chelsea imeambulia pointi nne, wakati Manchester City na Arsenal zote zimeambulia pointi moja kila moja na hivyo kufanya mpambano wa timu za juu kuwa mkali.

Kiungo ambaye pia ni nahodha wa Liverpool, Steven Gerrard, alikiri kwamba wao wamekuwa wakiufukuzia ubingwa kimya kimya ingawa ni mapema kusema lolote kuhusu taji hilo.

“Sisi tunaendelea kucheza na kujaribu kushinda mechi nyingi kadiri tuwezavyo. Tuna faida kwa sababu hatuchezi michuano ya Ulaya, tuna Ligi tu na michuano ya FA ndio ambayo tunaizingatia kwa umakini,” alisema Gerrard ambaye penalti yake ya dakika za majeruhi iliipatia Liverpool ushindi muhimu.

TOA MAONI YAKO HAPA CHINI