SOMA KISA CHA HUYU SHABIKI ALIE UMIA KULIKO MASHABIKI WOTE WALIO KOSA MATCH ZIDI YA EVERTON NA CRYSTAL PALACE

MASHABIKI wa timu zote mbili walihuzunika baada ya mechi ya Everton na Crystal Palace ya Ligi Kuu England iliyopaswa kufanyika Jumatano iliyopita kuahirishwa kutokana na hali mbaya ya hewa.

Lakini, kwa mashabiki hao kuna shabiki mmoja alihuzunika zaidi,  pengine kuliko wengine wote.

Ric Wee, ambaye alisafiri umbali wa maili 6,544.8 kutoka Malaysia hadi England kwa mara ya kwanza akiwa na lengo la kwenda kuitazama Everton ikicheza ‘laivu’. Alifunga safari hiyo baada ya kuishabikia timu hiyo kwa miaka 30 akiwa huko.

Aliamini tukio hilo lingekuwa la aina ya kipekee kwake akisafiri umbali huo kwenda kuitazama timu yake anayoishangillia ikicheza tena kwenye uwanja wa nyumbani wa Goodison Park. Ingekuwa mara yake ya kwanza kwa maisha yake kuitazama Everton ikicheza ‘laivu’ baada ya miaka yote 30 kuishia kuitazama kupitia televisheni.

Ndoto za miaka 30 zakwama

Wee akiamini kwamba ndoto zake za kuitazama Everton kwa macho yake moja kwa moja ikicheza inatimia, aliketi jukwaani uwanjani Goodison Park akisubiri muda tu wa mechi ufike kwani aliwahi zaidi kufika uwanjani hapo.

Katika kuwaonyesha mashabiki wenzake aliowaacha Malaysia, Wee alipiga picha inayomwonyesha akiwa uwanjani hapo na kisha kuituma kwenye mtandao wa kijamii.

Lakini, dakika chache baadaye tangu alipoketi kwenye viti vya Goodison Park, polisi walifika hapo na kutangaza kwamba mechi ya soka kati ya wenyeji Everton na Crystal Palace imeahirishwa kwa sababu ya hali mbaya ya hewa ambapo upepo uliangusha majengo yaliyopo karibu na uwanja huo hivyo kulikuwa na hatari kubwa ya hali ya kiusalama.

Ujumbe wake kwenye Twitter

Kwa furaha kubwa, shabiki huyo aliandika ujumbe wake kwenye Twitter saa moja kabla ya mechi hiyo na aliandika: “Hatimaye, miaka 30 tangu ya kuishabikia Everton, nitaitazama EFC ikicheza ‘laivu’ kwa mara ya kwanza.”

Lakini, dakika chache baadaye tangazo la mechi kuahirishwa lilitolewa na jambo hilo lilimfanya Wee kuonekana kuwa na hasira kwa sababu ya hewa imemtibulia nafasi yake ya kuitazama Everton, timu yake kipenzi ikicheza yeye akiwamo uwanjani kuishuhudia.

Baadaye alikaza moyo na kujifariji baada ya kutuma ujumbe mwingine kwenye Twitter unaomwonyesha akiwa na ratiba za mechi za Everton pamoja na tiketi ya mechi, aliandika: “Kwa bahati mbaya Everton vs Palace mechi imeahirishwa kwa sababu ya hali ya hewa kuwa mbaya. Ndoto ya kuitazama EFC bado ipo palepale.”

Atembezwa vyumbani

Jambo la bahati kwake ni kwamba shabiki huyo wa kutupwa wa Everton alitulizwa kiasi na Everton baada ya kutembezwa kwenye vyumba vya kubadilishia nguo vya timu hiyo na kukutana na mastaa wa kikosi hicho.

Kwenye vyumba hivyo, Wee alionekana akifurahia jambo na kocha wa Everton, Roberto Martinez na beki wa kushoto, Leighton Baines, ambaye pia alimpa jezi iliyosainiwa ikiwa ni zawadi ya kurudi nayo kwao Malaysia.

Lakini, Wee hakuwa shabiki pekee wa Everton aliyesafiri kwa umbali mrefu kwenda kutazama mechi hiyo kwa mara ya kwanza na kisha ikaahirishwa.

Baadaye klabu ya mashabiki wa Everton waishio Malaysia waliandika kwenye ukurasa wao wa Twitter: “Wamalaysia wanaoishabikia Everton, Ridhwan Razak na Ric Wee, watakwenda kuitazama timu hiyo ikicheza kwa mara ya kwanza.”

Ujumbe huo ulitumwa siku moja kabla ya mechi hiyo ambayo haikufanyika.

Wafanyiwa mapokezi mazuri

Mkurugenzi wa Mawasiliano wa Everton, Alan Myers, alisema baada ya Wee kushindwa kutimiza ndoto zake za kuitazama ‘laivu’ kwa mara ya kwanza klabu yake ikiwa uwanjani, klabu imechukua jukumu la kumtembeza maeneo mbalimbali ya uwanjani Goodison Park ili kujionea miundombinu katika klabu hiyo.

Jambo hilo lilipangwa kufanyika juzi Alhamisi asubuhi na jioni Wee alitarajiwa kupanda ndege na kurudi Malaysia. Baada ya kupata fursa ya kukutana na wachezaji mastaa wa kikosi hicho na kuona vitu mbalimbali vya kihistoria kwenye klabu hiyo, Wee alishukuru kwa mapokezi aliyoyapata na kuushukuru uongozi wa klabu hiyo kwa kuwathamini mashabiki wao.

TOA MAONI YAKO HAPA CHINI