TAARIFA KUTOKA KENYA ZASEMA KUWA SERIKALI YA KENYA YAISHTUMU SERIKALI YA MAREKANI KWA UCHOCHEZI NCHINI HUMO

Serikali ya Kenya imelilalamikia vikali shirika la misaada la Marekani USAid kuwa linafanya njama za kuzusha machafuko nchini Kenya. Francis Kimemia, Mwenyekiti wa Kamati ya Ushauri wa Usalama wa Taifa ya Kenya ameushutumu Wakala wa Kimataifa wa Ustawi wa serikali ya Marekani USAid kuwa unatumia fedha zake kuchochea maandamano dhidi ya serikali ya Jubilee na unadhamini harakati za siri za kuleta machafuko nchini Kenya. Asasi hiyo ya serikali ya Marekani iliasisiwa mwaka 1961 na inajifanya kutoa misaada ya kifedha na isiyo ya kijeshi kwa nchi zenye maendeleo madogo duniani. Hata hivyo shirika hilo la serikali ya Marekani limekuwa likituhumiwa kuingilia masuala ya ndani ya nchi nyingine na hivi sasa serikali ya Kenya inaishutumu Marekani kuwa inatumia asasi yake hiyo kufanya njama dhidi ya serikali ya Jubilee. Francis Kimemia ameongeza kuwa, lengo la njama hizo za Marekani ni kusukuma pole pole malalamiko ya watu ndani ya Bunge la Kenya ili kuwachochea wabunge wa Kenya waifanyie uadui serikali ya nchi hiyo. Nchi ya Kenya ni maarufu kwa jina la lango la kuingilia eneo la mashariki mwa Afrika na ni moja ya nchi zenye ushirikiano mkubwa na Marekani katika masuala mbalimbali. Hata hivyo baada ya kuchaguliwa serikali ya Jubilee ya Rais Uhuru Kenyatta na makamu wake William Ruto huko Kenya, uhusiano wa Marekani na Kenya umeshuhudia malumbano ya mara kwa mara huku Rais wa Marekani akionesha wazi kuwa hakufurahia kuingia madarakani serikali ya Jubilee. Kesi zinazowakabili Uhuru Kenyatta na William Ruto huko ICC zilidaiwa kuwa ndizo sababu zilizoifanya Marekani isifurahie viongozi hao wawili kuingia madarakani nchini Kenya. Hata hivyo baadhi ya weledi wa mambo wanasema, kuna sababu nyingine zilizoifanya Marekani na hasa Rais Barack Obama wa nchi hiyo kuchukizwa na chaguo la Wakenya katika uchaguzi mkuu uliopita. Alaakullihaal, baadhi ya wachambuzi wa mambo wanasema kuwa, katika miaka ya hivi karibuni, Marekani imekuwa ikikwepa kuingia moja kwa moja katika masuala ya kisiasa na kijeshi ya nchi za Afrika ingawa hata hivyo imeelekeza nguvu zake zaidi upande wa Somalia. Umuhimu wa kijiografia wa Somalia huko Pembe ya Afrika umetajwa kuwa ndio uliowafanya viongozi wa Marekani waipe uzito mkubwa nchi hiyo. Hivi sasa serikali ya Kenya inaishutumu Marekani kuwa inafanya njama za kuleta machafuko ndani ya Kenya, baadhi ya wafuatiliaji wa mambo wanaamini kuwa kuna uwezekano hatua ya Marekani ya kujaribu kuleta machafuko huko Kenya ni kuifanya serikali ya Nairobi ishughulishwe na masuala yake ya ndani ya kuachana na suala la Somalia ambako imetuma wanajeshi wake kupambana na wanamgambo wa ash Shabab na hivyo kupunguza washindani wa Marekani katika kadhia ya Somalia. Tamko kali la Kamati ya Ushauri wa Usalama wa Taifa ya Kenya dhidi ya Marekani limetolewa baada ya wanaharakati wa asasi za kijamii kufanya maandamano mjini Nairobi. Waandamanaji wameituhumu serikali ya Jubilee kuwa imejaa ufisadi na ubadhirifu na imeshindwa kupambana na umaskini, ukosefu wa kazi na ukosefu wa usalama nchini Kenya. Kwa upande wake serikali ya Kenya inaishutumu Marekani kuwa ndiyo inayochochea machafuko dhidi ya serikali na inasema kuwa, ina ushahidi wa kutosha unaothibitisha kwamba asasi ya serikali ya Marekani ya USAid ndiyo inayochochea uasi dhidi ya serikali ya Jubilee. Ni jambo lililo wazi kuwa kuingilia masuala ya ndani ya nchi nyingine ni kinyume na sheria za kimataifa, tab'an Marekani ina historia chafu ya kutojali sheria zozote zile mbele ya malengo yake ya kibeberu.

TOA MAONI YAKO HAPA CHINI