TAARIFA KUTOKA KWA MONUSCO ZASEMA KUWA WAASI WAMEWAMALIZIA MAISHA WATU WAPATAO 70 HUKO MASHARIKI MWA DRC

Kikosi cha kulinda amani cha Umoja wa Mataifa huko mashariki mwa Jamhuri ya Kidemokrasia ya Congo, kimetangaza kuwa, watu zaidi ya sabini waliuawa mwishoni mwa mwezi uliopita wa Januari na  mapema mwezi huu huko Congo Kinshasa kufuatia mashambulio ya waasi. Afisa mmoja wa Kikosi cha kusimamia amani cha Umoja wa Mataifa MONUSCO amewaambia waandishi wa habari mjini Goma kwamba, ndege ya wanajeshi wa UN, iliyokuwa ikifanya uchunguzi katika eneo hilo, iligundua kuwa vijiji vitatu viliteketezwa na kuharibiwa kabisa. Umoja wa Mataifa, umesema kuwa, mauaji hayo yalitekelezwa na makundi ya waasi yaliyojihami katika mkoa wa Kivu  Kaskazini, ili kuzusha hofu baina ya watu wanaoishi katika eneo hilo.

Martin Kobler, mjumbe maalumu wa Umoja wa Mataifa katika Jamhuri ya Kidemokrasia ya Congo ameelezea wasi wasi wake mkubwa alionao kutokana na ukiukaji wa haki za binadamu katika nchi hiyo.

TOA MAONI YAKO HAPA CHINI