WACHAMBUZI WA SOKA WASEMA KUWA MABAO 132 YALITIWA WAVUNI NA WACHEZAJI WASIOANZA MECHI YANI WANAO GOMBOWA

YANAPOTAJWA majina yao; David Fairclough, Ole Gunnar Solskjaer, Tore Andre Flo na hawa wa siku za hivi karibuni akina Edin Dzeko na Javier Hernandez, kitu cha kwanza kinachokuja akilini ni  kwamba hao ni wakali wa kubadili matokeo ya mchezo wa soka wanaoanzia kwenye benchi.

Kwenye mchezo wa soka kuna lugha yake inayowatambulisha watu hawa ‘Super Sub’.

Wachezaji wanaoanzishwa benchi kwenye mechi kadhaa na kisha kila wanapoingizwa husababisha matokeo ya mchezo kubadilika kwa maana ya kufunga mabao au kutengeneza mabao hayo, nyota hawa hutambulika kwa jina la ‘Super Sub’.

Kwenye Ligi Kuu England, klabu za Manchester City, Swansea na West Bromwich Albion, zimewatumia sana wachezaji hao na kuvuna mabao 12 ambayo yamewasaidia katika kupata matokeo bora kwenye mechi zao.

Lakini, katika mikikimikiki ya ligi hiyo, kuna timu ambayo imechemsha na kushindwa kupata hata bao moja licha ya kufanya mabadiliko mengi zaidi ya wachezaji kuliko klabu nyingine zote kwenye Ligi Kuu England.

Norwich City ambayo kocha wake, Chris Hughton, amebadilisha wachezaji mara 63, lakini hakuna hata mmoja kati ya nyota wake walioanzia benchi aliyeweza kufunga mabao au kusababisha bao kufungwa.

Hadi kufikia sasa kwenye msimu huu, kwenye matokeo ambayo timu yake imefungwa, Hughton alifanya mabadiliko 63 ya wachezaji akiwa na imani ya kubadili matokeo, lakini hakufanikiwa.

Wachezaji walioanzishwa benchi na kisha kuingizwa uwanjani ili wakabadili matokeo, lakini wakashindwa kufanya hivyo ni pamoja na Robert Snodgrass, Wes Hoolahan, Johan Elmander, Jonny Howson, Anthony Pilkington, Alexander Tettey, Ryan Bennett, Gary Hooper, Nathan Redmond, Josh Murphy, Steven Whittaker, Ricky van Wolfswinkel, Luciano Becchio na Leroy Fer.

Kwenye Ligi Kuu England wakati kwa sasa upinzani zaidi ukiwa umeongezeka kwenye nafasi nne za juu, katikati na mkiani, kuna timu zimefaidika na wachezaji wanaoanzia benchi kutokana na kusababisha matokeo mazuri kila wanapoingizwa.

Kwenye Top Four

Manchester City inashika nafasi ya tatu kwenye msimamo wa Ligi Kuu England na pointi zake 54, tatu nyuma ya vinara Chelsea. Lakini kikosi hicho kinachonolewa na Manuel Pellegrini, kimevuna mabao mengi zaidi yaliyotokana na wachezaji wake walioanzia benchi.

Timu hiyo imefanya mabadiliko mara 70 na wachezaji wanane walifunga mabao na wengine wanne walitengeneza nafasi za kufunga na kufanya jumla ya mabao 12.

Chelsea na Arsenal zote zimevuna mabao manane yaliyotokana na wachezaji walioanzia benchi, lakini vinara wanaonolewa na Mreno Jose Mourinho wakifanya mabadiliko mara 78 dhidi ya mara 70 za kikosi cha Mfaransa, Arsene Wenger.

Kwenye orodha hiyo, wachezaji sita wa Chelsea walifunga mabao na wawili walipiga pasi za mabao, wakati kwa upande wa Arsenal ni nusu kwa nusu, wanne walifunga na wengine wanne walitengeneza nafasi za mabao.

Liverpool imefanya mabadiliko mara 58 na wachezaji wawili walifunga na wawili walitengeneza nafasi za mabao jambo lililowafanya kuvuna mabao manne kutokana na wachezaji hao walioanzia kwenye benchi.

Kwa jumla mabao 32 yalifungwa kutokana na wachezaji walioanzia benchi kwenye timu zilizopo ndani ya nne bora kwenye Ligi Kuu England.

Ndani ya 10 bora

Mabingwa watetezi, Manchester United, wamenasa kwenye nafasi ya saba kwenye msimamo. Kocha wao, David Moyes, amefanya mabadiliko 68 ya wachezaji kwa maana ya kutaka wabadilishe matokeo, lakini amefunga mabao sita tu.

Kwenye kundi hili, Swansea inaoongoza baada ya kuvuna mabao 12 kwa kufanya mabadiliko mara 62, nyota wanne wakifunga na wengine wanane walitengeneza nafasi.

Timu nyingine zilizovuna mabao mengi ya wachezaji wa akiba kwenye kundi hili ni Tottenham yenye mabao matano baada ya kubadili wachezaji 71, Newcastle mabao saba kutoka kwa wachezaji 70, Southampton mabao sita kutoka kwa wachezaji 70 na Everton imepata mabao manane kutoka kwa wachezaji 68.

Timu za katikati

West Ham imefanya mabadiliko 77 ya wachezaji na kuvuna jumla ya mabao tisa kwenye kundi la timu zinazodaiwa kuwa na ushindani mkubwa kutokana na kugoma kuporomoka kwenye eneo la kushuka daraja.

Crystal Palace imepata mabao sita baada ya kubadili wachezaji mara 73, wakati Stoke City imebadili wachezaji mara 66 na kuvuna mabao sita pia, huku Hull City ikipata mabao matatu tu kutoka kwa wachezaji 72 iliyowabadilisha sawa na Aston Villa iliyopata idadi kama hiyo ya mabao, lakini yenyewe ikifanya mabadiliko 63 ya wachezaji walioanzia benchi.

Ndiko kwenye vita kali zaidi. Fulham wikiendi iliyopita iliigomea Manchester United kabla ya Jumatano iliyopita kufungwa dakika za mwisho na Liverpool, shukrani kwa mkwaju wa penalti wa dakika za majeruhi wa kiungo, Steven Gerrard.

Hadi kufikia sasa kwenye ligi hiyo, Fulham imefanya mabadiliko 73 ya wachezaji walioanzia benchi na kupata mabao matano, lakini West Brom ikivuna mabao mengi zaidi kwa kupata 12 kutoka kwa wachezaji 76 iliyowabadilisha.

Timu nyingine kwenye fungu hilo ni Cardiff City ambayo imepata mabao sita kwa wachezaji 74, sawa na Sunderland iliyofunga mabao kama hayo baada ya kubadilisha wachezaji 70, huku Norwich City ikitia fora kwa kushindwa kufunga mabao licha ya kubadilisha wachezaji mara 63.

Mabao yaliyofungwa

Kwenye orodha ya mabao yote yaliyofungwa na wachezaji walioanzia benchi kwenye Ligi Kuu England msimu huu, ni 132 kati ya mabao 690 yaliyofungwa kwenye ligi hiyo baada ya wastani wa mechi 26 kwa timu, licha ya baadhi ya timu ikiwamo Manchester City yenye mabao mengi zaidi ya kufunga, kuwa nyuma kwa mchezo mmoja.

TOA MAONI YAKO HAPA CHINI