TAARIFA KUTOKA ALGERIA ZASEMA KUWA HALI YA USALAMA KWA SASA SIO NZURI

Mapigano makali yameanza tena baina ya Waislamu wa Madhehebu ya Maliki na Ibadhi na kusababisha watu kadhaa kujeruhiwa na nyumba kadhaa kuchomwa moto huko kusini mwa Algeria. Khadhwir bin Babaz mmoja wa viongozi eneo hilo amesema kuwa, kikosi cha usalama cha Algeria kimetumwa kusini mwa nchi hiyo kwa shabaha ya kuzuia mapigano hayo yasisambae zaidi. Kiongozi huyo amesema kuwa, makumi ya watu wamejeruhiwa na makumi ya magari yameteketezwa. Makundi hayo mawili yaliwahi kupigana mwishoni mwa mwaka 2013 na kusababisha watu kadhaa kujeruhiwa. Rais Abdulaziz Bouteflika wa Algeria ameiagiza Wizara ya Mambo ya Ndani ya nchi hiyo kutafuta njia za kurejesha amani katika eneo hilo. Wafuasi wa Madhehebu ya Maliki ni wachache huku Maibadhi wakiunda asilimia kubwa ya waumini wa Kiislamu katika eneo la kusini mwa Algeria.

TOA MAONI YAKO HAPA CHINI