MAREKANI YAPATWA NA HOFU KUHUSU TABIA YA UBAGUZI YA ISRAEL

Hatu ya  wakuu wa utawala haramu wa Israel ya kukaidi matakwa ya kimatiafa kuhusu kuheshimu misingi ya awali kabisa ya haki za binaadamu ni jambo ambalo sasa limepelekea hata muitifaki wa karibu kabisa wa Tel Aviv, yaani Marekani kuingiwa na wasi wasi kuwa Israel itabadilika na kuwa utawala wa ubaguzi wa rangi au Apartheid. John Kerry Waziri wa Mambo ya Nje wa Marekani hivi karibuni amesema kuwa iwapo Israel haitakubali pendekezo la kuundwa nchi mbili huru katika ardhi za Palestina zinazokaliwa kwa mabavu basi katika siku za usoni utawala wa Tel Aviv utageuka na kuwa utawala wa ubaguzi wa rangi. Huu unahesabiwa kuwa ukosoaji mkali zaidi hadi sasa wa wakuu wa Marekani kwa muitifaki wao, Israel.  Pamoja na matamshi hayo ya Kerry kile kilicho wazi ni kuwa tokea kuundwa utawala haramu wa Israel, utambulisho wake umekuwa ni wa ubaguzi wa rangi sawa na ule wa makaburu waliotimuliwa Afrika Kusini. Wazayuni wana mtazamo potofu kuhusu dini ya Uyahudi na Kitabu cha Taurati. Wanaamini kuwa kaumu ya Mayahudi ni bora kuliko kaumu na dini zingine zote duniani. Kwa hivyo tunaweza kusema kuwa hata kabla ya kuundwa utawala bandia wa Israel mwaka 1948, Uzayuni ulikuwa sawa na ubaguzi wa rangi na kikaumu. Historia ya kukaliwa kwa mabavu Palestina na kuundwa makundi ya Mayahudi wahajiri ni jambo lililoanza mwanzoni mwa karne ya 20. Katika kipindi hicho Wazayuni walikuwa na nadharia iliyokita mizizi kuhusu kutenganishwa watu kwa msingi wa rangi. Mwanzoni mwa karne ya 20 Wazayuni walifanya juhudi za kuunda jamii mbili tafauti. Moja ilikuwa ni ya Wapalestina Waarabu waliowengi ambao aghalabu ni  masikini na walioishi katika hali ngumu na katika upande wa pili ni jamii ya Mayahudi wahajiri wenye utajiri mkubwa pamoja na kila kitu walichohitajia mbali na kushikilia hatamu za utawala. Leo baada ya kupita miaka 70 tokea Mayahudi waikalie kwa mabavu ardhi ya Palestina, tunashuhudia zaidi ya wakati wowote ule kudhihiri kwa kiwango kikubwa ubaguzi wa rangi Israel. Ujenzi wa ukuta wa kibaguzi katika Ukingo wa Magharibi wa Mto Jordan ni mfano wa wazi kabisa wa sera za kibaguzi za kuwatenganisha Wapalestina na Mayahudi. Aidha ujenzi wa vitongoji vya Walowezi wa Kizayuni katika ardhi za Palestina zilizokaliwa kwa mabavu mwaka 1967, mbali na kuwa kinyume cha sheria za kimataifa pia kunafanyika kwa lengo la kuwatenganisha kibaguzi wakaazi wa eneo hilo. Ujanja waliotumia wakuu wa Israel katika kufunika utawala wao wa kibaguzi ni kuruhusu Waarabu waishio katika ardhi zao zilizoporwa mwaka 1948 kuwa na wajumbe katika Bunge la Israel, Knesset. Pamoja na hayo, wale wote wanaokuja madarakani Israel huwa na ndoto ya muda mrefu ya kuwatimua kikamilifu Waarabu na Waislamu kutoka Israel na kuunda dola wanaloliita la Kiyahudi. Wakuu wa Israel hutamka lengo lao hilo la kibaguzi pasina kuwa na wasi wasi. Iwapo maneno kama hayo yangetamkwa sehemu nyingine duniani yangehesabiwa kuwa ni jinai ya kujitangazia ubora wa kikaumu na kidini. Lakini huko Israel kuwasilishwa pendekezo la kuwafukuza Waarabu na Waislamu katika ardhi zao za jadi si tu kuwa hakulaaniwi bali wanaotoa pendekezo hilo la ubaguzi wa rangi na kidini hutunukiwa zawadi na kupewa cheo cha waziri wa mambo ya nje. Kwa maelezo hayo sera za kibaguzi za Israel ziko wazi na haziwezi kufichika. Hii ndio sababu  hata Umoja wa Mataifa pamoja na kuwa unadhibitiwa na waitifaki wa Israel yaani Marekani na nchi za Ulaya, ulitangaza kuwa Uzayuni ni sawa na ubaguzi wa rangi. Hivi sasa mkuu wa chombo cha diplomasia cha serikali ya sasa ya Marekani ambayo inahesabiwa kuwa serikali tiifu zaidi kwa Israel, imeonya kuwa ukaidi wa Tel Aiv unaweza kuibadilisha Israel kuwa utawala wa kibaguzi. Suala hili linaaonyesha ni kiasi gani Israel ilivyotengwa duniani hata na muitifaki wake wa karibu zaidi.

TOA MAONI YAKO HAPA CHINI