MASHAHIDI WA 8 WA KESI YA BWANA RUTO WAOMBWA MBELE YA MAHAKAMA YA ICC.

Mahakam ya Kimataifa ya Uhalifu imeamrisha Serikali ya Kenya ishurutishe mashahidi wanane kufika mbele ya mahakama hiyo kutoa ushahidi dhidi ya Naibu Rais William Ruto na mwanahabari Joshua arap Sang.

Uamuzi huo umetolewa kufuatia ombi la Kiongozi wa Mashtaka Fatou Bensouda, aliyedai mashahidi hao walishawishiwa kwa njia tofauti, ikiwemo vitisho na kwa kuhongwa, ili waache kushirikiana naye kwenye kesi hiyo.

Bi Fatou Bensouda

“Mahakama ilipata kuwa Serikali ya Kenya ina jukumu la kushirikiana kikamilifu na mahakama kwa kukabidhi mashahidi amri ya kufika mahakamani na kusaidia katika kuwashurutisha wafike mbele ya mahakama, kwa kutumia mbinu yoyote iwezekanavyo kuwalazimisha,” uamuzi huo ulisema.

Kenya ina wajibu pia wa kufanikisha kushiriki kwa mashahidi hao kupitia kiunganishi cha video na pia kuwahakikishia usalama wao hadi wafike mbele ya mahakama hiyo.

Mawakili wa wawili hao walikuwa wamepinga ombi hilo na kutaka mahakama itoe tu ombi la kuwataka wanane hao wafike mahakamani, bila kuwalazimisha.

Ombi

Kwa upande wake, Serikali kupitia kwa Mkuu wa Sheria Profesa Githu Muigai ilikuwa imejitetea kuwa ombi hilo la Bi Bensouda halingeweza kutekelezwa kwa kuwa lingekiuka sheria za kitaifa.

Kulingana na Profesa Muigai, sheria zinahitaji mashahidi wafike mbele ya mahakama kwa hiari bila kulazimishwa na yeyote.

Hata hivyo, mahakama ilisema kuwa uamuzi wao unaambatana na sheria za kimataifa pamoja na Mkataba wa Roma unaounda sheria za ICC.

TOA MAONI YAKO HAPA CHINI