HAWA NDO WAKALI WA NGWARA KWENYE LIGI KUU YA UINGEREZAA

MOJA ya sehemu zinazofanya Ligi Kuu England ionekane ni ngumu ni namna wachezaji wanavyotumia nguvu, asilimia kubwa ya wanaotokea Hispania au Amerika Kusini wamekuwa wakipata shida kuendana nayo.

Premiership pia ni kati ya ligi zinazoundwa na wachezaji wengi wenye maumbo makubwa, lazima watakuwa na nguvu na mazoezi yao ni ya kiwango cha juu zaidi.

Ndiyo maana inapendwa zaidi na hakuna mchezaji anayeweza kufanya mzaha wa mazoezi kama anajua anashiriki katika ligi hiyo kwa kuwa anaijua shughuli.

Pamoja na wachezaji kuwa fiti, karibu kila mchezaji wa timu aliyekuwa akijua wanakutana na Stoke City basi alijua kweli shughuli ipo na lazima ajiandae mara mbili zaidi.

Sayansi inasema hivi, kila mchezaji anavyozidi kuwa na umbo kubwa, zaidi anategemea nguvu na anayekuwa na umbo dogo, tegemeo lake ni ujuzi zaidi.

Katika ligi hiyo ambayo imemalizika jana, Stoke City ni kati ya timu tatu za ligi hiyo zenye wachezaji wenye maumbo makubwa zaidi, nyingine ni Man City.

Mabeki wa Stoke City walikuwa wanasifika kwa ubabe lakini timu nyingi ziliwalalamikia kwa kucheza faulo ‘unprofessional’, yaani si za kiuanamichezo, unaweza kuzilinganisha na zile za mchangani.

Wakati fulani, Bolton ikiwa katika Ligi Kuu England ilipewa sana sifa hiyo, lakini baadaye ikahamia kwa Stoke City ambayo imeweka fora msimu huu kwa kucheza faulo nyingi zaidi ya timu nyingine zote.

Stoke City imeshika nafasi ya pili kwa faulo za kiuanamichezo, lakini ikaweka rekodi kwa kuwa na faulo nyingi ambazo si za kiuanamichezo na zikijumlishwa ndiyo inashika namba moja kwa faulo nyingi zaidi zilizozaa kadi.

Faulo walizopiga ni nyingi zaidi lakini hapa zinazungumziwa zile zilizozaa kadi, maana yake zilizidi kawaida hadi zikasababisha waamuzi kushindwa kuwa wavumilivu na kutoa kadi.

Lakini wakati wanatoa kadi, kuna faulo za kiuanamichezo na zile zinazoonekana si za kiuanamichezo na zote zimezaa kadi ingawa inategemea ni nyekundu au njano. Angalia takwimu zenyewe (Takwimu hizo ondoa mechi za jana).

Stoke:

Kwa faulo za kiunamichezo imefanya 51 ambazo ni za pili kwa wingi kwa zile za kiuanamichezo. Lakini Stoke imeweka rekodi kwa kuwa na kadi 11 zilizotokana na faulo zisizo za kiuanamichezo.

Maana yake Stoke ina faulo 62 zilizozaa kadi katika mechi zake 37, kiwango ambacho ni cha juu baada ya Aston Villa yenye 64 lakini Stoke City inaenda juu kwa kuwa ina faulo nyingi zaidi ambazo si za kiuanamichezo na kudhihirisha kweli ni wababe wala si hadithi.

Aston Villa:

Wana faulo 61 zilizozaa kadi lakini zote zimehesabika ni za kiuanamichezo, lakini wana tatu ambazo si za kiuanamichezo. Maana yake idadi yote ya kadi zao bila kujali ni nyekundu au njano inafikia 64.

West Ham:

Wagonga Nyundo hao, nao wamo kwa viatu na wamepiga faulo 51 lakini zikahesabiwa ni za kiuanamichezo pamoja na kwamba zilizaa kadi. Halafu ‘wakachapa’ tatu pia ambazo zikapewa cheo cha kutokuwa za kiuanamichezo, jumla 54.

Manchester City&United:

Katika mechi 37, yaani kabla ya mechi za jana, timu hizo zenye upinzani mkali katika Jiji la Manchester, zilifunga sawasawa kwa faulo zilizozaa kadi. Kila moja ilichapa mara 49 kwa faulo za kiuanamichezo na tatu zisizokuwa za kiuanamichezo. Maana yake zina jumla ya 52, kila upande. Spurs pia imekuwa na idadi sawa na timu hizo mbili.

Nyingine:

Arsenal wamekuwa na faulo 41 zilizozaa kadi za kiuanamichezo lakini pia tatu zisizo za kiuanamichezo. Liverpool ikawa na 38 za kiuanamichezo na tatu zilizopewa cheo kuwa zisizokuwa za kiuanamichezo.

Chelsea waliokuwa wanaonekana wababe, ajabu inaonekana takwimu zinawafuta katika hisia hizo maana wamepata jumla ya kadi 39, kati ya hizo 35 za kiuanamichezo na nne zisizokuwa za kiuanamichezo.

Picha zaidi hizi hapa chini: