MAHAKAMA YA RUFAA YA JIJINI NAIROBI IMEMVUWA CHEO GAVANA WA JIJI HILO DKT EVANS KIDERO.

Mahakama ya Rufaa jijini Nairobi, Kenya, imebatilisha uchaguzi wa Gavana wa jiji hilo, Dkt Evans Kidero na kuagiza uchaguzi mdogo ufanyike. Mahakama imesema uchaguzi uliompa ushindi Dkt. Kidero ulikumbwa na matatizo chungu nzima ukiwemo uchakachuaji na ukiukwaji wa sheria za uchaguzi. Majaji wawili kati ya watatu waliosikiliza kesi hiyo wamesema makosa yaliyojitokeza kwenye uchaguzi huo yaliufanya ukose kufikia kiwango kinachohitajika kisheria na hivyo kubatilisha matokeo yake. Hata hivyo jaji mmoja kwenye jopo hilo amesema hakuona makosa makubwa kwenye uchaguzi huo uliompa ushindi Bw. Kidero na hivyo kwa mtazamo wake amesema gavana huyo wa mji mkuu wa Kenya alichaguliwa kihalali. Huko nyuma mahakama kuu ilikuwa imeamua kwamba mwanasiasa huyo alichaguliwa kihalali. Mpinzani wake wa Karibu, Ferdinand Waititu alikata rufaa kupinga uamuzi wa mahakama kuu na hatimaye rufaa yake imezaa matunda. Hata hivyo Kidero amesema atakwenda katika mahakama ya kilele (Supreme Court) kupinga uamuzi wa majaji wa mahakama ya rufaa.

Evans Kidero ni Gavana wa pili kupoteza cheo chake wiki hii baada ya mwenzake wa jumbo la Embu, Martin Wambora kutimuliwa na Bunge la Seneti kutokana na tuhuma za utumizi mbaya wa mamlaka yake na ufujaji wa fedha za umma.

TOA MAONI YAKO HAPA CHINI