OPERESHENI ZA SASA ZA MAJESHI YA D.R.C ZAUNGWA MKONO NA MONUSCO

Kikosi cha kulinda amani cha Umoja wa Mataifa katika Jamhuri ya Kidemokrasia ya Kongo MONUSCO kimeunga mkono operesheni zinazofanywa hivi sasa na majeshi ya nchi hiyo dhidi ya makundi ya waasi. Luteni Kanali Felix Basse Msemaji wa vikosi vya MONUSCO ameyasema hayo mjini Goma na kuongeza kuwa, uungaji mkono huo unafanyika huku vikosi vya umoja huo vikiendelea kufanya doria mbalimbali katika maeneo ya Bohuma, Bukiringi na Borasi.

Luteni Kanali Basse ameongeza kuwa, operesheni hiyo inafanywa na wanajeshi wa Umoja wa Mataifa kutoka nchi za Guatemala na Bangladesh. Msemaji wa MONUSCO nchini Kongo amefafanua kuwa, operesheni ya doria inafanyika kwa lengo la kuzuia uwezekano wa kutokea shambulio la kushtukiza la makundi ya waasi sanjari na kulinda maisha ya raia katika eneo la Tshabi.

Inafaa kuashiria hapa kuwa, eneo la mashariki mwa Kongo limekuwa likikabiliwa na machafuko  yanayosababishwa na makundi ya waasi  ambapo inasemekana kuwa makundi hayo yanapata uungaji mkono wa serikali za Uganda na Rwanda, tuhuma ambazo zimekadhibishwa mara kadhaa na serikali za Kigali na Kampala.

TOA MAONI YAKO HAPA CHINI