WATU WAPATAO 20 NA ZAIDI WAMEUWAAWA NA KUNDI LA BOKO HARAM KWENYE KIJIJI CHA WAGA NCHINI NIGERIA

Kwa akali watu 20 wameuawa baada ya wanamgambo wa kundi la Boko Haram kushambulia kijiji cha Waga kilichoko kaskazini mashariki mwa Nigeria. Ahmad Soji Msemaji wa serikali ya Nigeria amesema kuwa, kundi la Boko Haram limetekeleza shambulio hilo na kuua watu 20 kwenye kijiji cha Waga kilichoko katika jimbo Adamawa. Msemaji wa serikali ya Nigeria ameongeza kuwa, wanamgambo wa Boko Haram ambao walivamia kijiji hicho wakiwa wamepanda pikipiki, walichoma moto nyumba za kijijini hapo baada ya kutekeleza mauaji hayo. Ahmad Soji ameongeza kuwa, baadhi ya wakazi wa kijiji hicho ambacho kwa asilimia kubwa ni Wakristo hawajulikani walipo, na inasadikiwa kuwa wamekimbilia misituni. Msemaji wa serikali ya Nigeria amebainisha kuwa, jeshi la serikali limefanikiwa kuzima shambulio jingine lililopangwa kufanywa katika kijiji cha Gublak kilichoko jirani na kijiji cha Waga. Inafaa kuashiria hapa kuwa, siku ya Jumamosi iliyopita, wanamgambo wa Boko Haram walishambulia vijiji vitatu vya Michika, Kirchiga na Shuwa na kuwaua watu wasiopungua 24 huko kaskazini mashariki mwa Nigeria.

TOA MAONI YAKO HAPA CHINI