HUYU NDO MCHEZAJI WA SOKA MWENYE ASILI YA BURUNDI ANAE WASUMBUWA WATANZANIA

Mshambuliaji wa Simba mwenye asili ya Burundi anae julikana kwa jina la Amissi Tambwe,inasemekana ametua kwa siri jijini Dar es Salaam na amefichwa akiwa chini ya ulinzi mkali kwa hofu kwamba Yanga inaweza kumshawishi ili kumchomoa Msimbazi.

Lakini si hilo tu, kufichwa kwake huko kulikofanywa na mmoja wa vigogo wanaowania urais wa Simba kwenye uchaguzi mwishoni mwa mwezi huu, pia kunalenga kumweka mbali na wapinzani wake kwenye uchaguzi huo akihisi wanaweza kumnasa, wakamrubuni na kumtumia kama sehemu ya kampeni na kumzidi kete.

Habari za kuaminika kutoka ndani ya Yanga zinadai kwamba baadhi ya vichwa vya kamati ya usajili vimefanya mazungumzo ya siri sana na mchezaji huyo wakiangalia uwezekano wa kusitisha mkataba wake wa mwaka mmoja aliobakiza kwenye club ya Simba.

Inadaiwa kwamba Yanga walikuwa wakimshawishi mchezaji huyo atumie sababu kuwa amepata timu nje na watakachofanya wao ni kumwongezea dau la usajili na mshahara zaidi ya mara mbili ya ule wa dola 800 anaopokea Simba. Lakini Simba wameshtukia dili na sasa wamekaba kila kona.

Wamehakikisha kwamba katika muda ambao Tambwe atakuwa Dar es Salaam hazururi ovyo na hapati upenyo wa kuzungumza na watu wa Yanga na hata simu yake haipatikani muda wote.

Tambwe alisema alikiri kwamba yupo Dar es Salaam, lakini hataki kuzungumzia mambo ya mpira kwa sasa kwa vile yanamweka kwenye wakati mgumu.

“Yananiweka kwenye wakati mgumu sana, labda nitafute kesho ndugu yangu,”alisema Tambwe kwa kifupi.

Siri imeanza kufichuka kuwa Tambwe yupo kwenye hoteli moja maeneo ya Ubungo lakini hataki yeyote ajue zaidi waliomleta.

Taarifa za uhakika ambazo mtandao huu umezipata kutoka kwa mtu wa karibu wa mshambuliaji huyo, zimeeleza kuwa Tambwe alitua nchini Tanzania mapema wiki hii akitokea nchini Burundi, lakini ujio huo ukifanywa siri kubwa ikiwa ni pamoja na kubadilishiwa sehemu ya kuishi.

Habari za ndani ya Simba zinasema sababu kubwa ya kumleta Tambwe Tanzania kabla ya muda wa kurudi kujiunga na timu hiyo ni kuweka sawa masuala yake ya mkataba na mambo madogo madogo yaliyokuwa na utata. Pia kumkabidhi tuzo yake aliyopatiwa na wadhamini wa Ligi Kuu, Kampuni ya Vodacom sambamba na Sh5.2milioni za kuwa Mfungaji Bora.

Alipo tafutwa Katibu Mkuu wa Simba, Ezekiel Kamwaga,  ambaye alikiri uwepo wa Tambwe nchini Tanzania akisema amekuja kuchukua kiasi cha fedha alichopatiwa na mtandao wa simu wa Vodacom huku akigoma kueleza sababu ya kufichwa kwa safari hiyo na hata kumhamisha alipokuwa anaishi.

“Nani amekwambia hizo taarifa? Kweli Tambwe yuko nchini, uongozi ndio uliomleta. Kama unavyojua, tupo katika uchaguzi lakini sekretarieti ipo na inafanya kazi zake. Amekuja kuchukua zawadi yake ya ufungaji bora sambamba na kuchukua fedha zake, mengine siwezi kukueleza,” alisema Kamwaga na kukata simu.

TOA MAONI YAKO HAPA CHINI