WAISLAM KADHAA WAMEUWAWA HUKO MYANMAR BAADA YA KUNDI LA WABUDHAA KUWASHAMBULIA.

Polisi ya Myanmar ametangaza kuwa, kwa akali watu wawili wameuawa kwenye mapigano mapya kati ya Mabudha na Waislamu katika mji wa Mandalay, mji wa pili kwa ukubwa nchini humo. Polisi ya Myanmar imeeleza kuwa, mapigano hayo yalitokea baada ya Mabudha kushambulia duka linalomilikiwa na Muislamu katika mji huo.
Polisi ilitumia risasi za plastiki kuwatawanya Mabudha waliokuwa wamejizatiti na visu, marungu na mawe.
Mkuu wa Polisi katika mji wa Mandalay amesema kuwa, uchunguzi umeshaanza ili kubaini watu waliohusika na shambulio hilo dhidi ya Waislamu. Wimbi la mashambulio ya Mabudha dhidi ya Waislamu lilianza mwaka 2012, yaliyopelekea zaidi ya watu 250 kuuawa na zaidi ya laki moja na elfu arobaini wengi wao wakiwa Waislamu kuwa wakimbizi. Waislamu nchini Myanmar wanaunda asilimia nne ya wakazi wote nchini humo.

Mashambulio na mauaji dhidi ya Waislamu yanatokea katika hali ambayo, Watawa wa Kibudha wenye misimamo ya kufurutu ada wamekuwa wakiwashawishi wananchi wa nchi hiyo kususia bidhaa zinazouzwa kwenye maduka ya Waislamu.

TOA MAONI YAKO HAPA CHINI